السبت , 19 أكتوبر 2019
الرئيسية » مرايا » لقطة حية من صنعاء .. سائق تكسي يختطف طفلة من شارع النصر

لقطة حية من صنعاء .. سائق تكسي يختطف طفلة من شارع النصر

31/07/2019

 

يحي العامري
سمعت اطلاق نار متقطع خرجت الى الشارع سمعت اغلب اصحاب المعارض والمحلات يتكلموا على اطلاق نار وملاحقه لسيارة بدون ارقام بس ماهم عارفين ليش .
المهم مشيت الشارع وصلت لاجنب سوق النصر اشوف. الامن ومدنيين محوشين كثير كنت اظن انه حادث مروري مافكرت ان له علاقة باطلاق الرصاص ، المهم وصلت ورجال الامن والمواطنين مجمعين حول عائلة والنساء يبكين ويصيحين سألت اللي كان جنبي ياخي خير ايش حصل.؟ قال اختطفوا بنت ذلحين تبع هولا النسوان .
كيف اختطفوها.؟ قال قالوا وصل صاحب تكس نزل النسوان هولا. شكلهن بزينه مشوار وهرب بالطفلة وهن صيحين والعسكر اللي كانوا هنا لحقوه بالطقم .قلت انا سمعت اطلاق رصاص اسفل الشارع ايش علاقته بالموضوع هذا. ؟ قال شخص آخر هم اطلقوا عليه يوقف لكن هرب. قلت ذلحين وينه قال يلاحقوه هارب ابن الحرام.
المهم جلست مع الناس المتواجدين واللي كل واحد كان يتكلم عن عقوبة مناسبة لو مسكوه. واحد يقل يعلقوه بالتحرير وآخر يقل يقتلوه يقع عبره لغيره …الخ .والجميع منصدم من الموقف وخاصة عند سماع النساء يبكين ويصيحن . انتظرنا حوالي عشر دقائق وصل دباب وسيارة شرطة وسيارات اخرى والناس حوشوا حولهم .قالوا مسكوا المجرم. المفاجئة انها نزلت امرأة مسنة تقريبا بعمر 60 وطفلة بعمر 5 او 6سنوات وهن يبكين من الخوف والموقف الذي حصل لهن. يعني اختطف الثنتين ! ،

بعد ان عادت الطفلة والمسنة .الجميع يسأل اين السواق المجرم ؟ اعتقد لو نزل من غضب الناس كان سيقتل على ايديهم .لكن قالوا في المستشفى .اتضخ انه لم يتوقف الا باطلاق رصاص عليه مرة اخرى بعد ان هرب الى صرف والامن يلاحقه وفقا لما كان يتكلم به الناس مكان الحادث .